10個婚禮隱形炸彈｜第一個已經炸你$3000

第一彈：紙碎浪漫背後的$3000清潔費

而家好興新娘同姊妹喺酒店床上灑紙碎影相，效果係好靚。但大部分酒店都會因為呢啲紙碎垃圾，向你收取不少於$3000嘅清潔費。想影呢張相？記得自備吸塵機，玩完自己吸乾淨。慳返嘅錢，用嚟買護膚品或者加個造型仲好。

第二彈：28座小巴嘅「數字陷阱」

Book咗一架28座小巴，唔好天真地以為真係坐到28個人。化妝師、攝影師、新人嘅行李、花球、後備裙、相機腳架……最少要預留8至10個位放物資。否則到時有人要搭的士。

第三彈：化妝中途被「上頭」突襲

按照吉時，大妗姐有機會喺你化妝期間要上頭。記得提早問清楚上頭嘅需時同禮節，等我哋化妝時間可以就一就。如果最後化妝時間被逼壓縮，造型質素受影響。

第四彈：攝影師到達時間冇夾好

好多新娘唔知，其實最好嘅安排係：等新娘子同姊妹完成晒妝造，先安排攝影師入場。因為化妝師佔用嘅空間好大，化妝箱、風筒、燈、工具鋪到成枱都係。等我哋化完、清完場，攝影師再入嚟，大家都有更好的空間做野。

第五彈：新郎係迷途羔羊

我做過咁多場婚禮，發現唔少新郎都係「迷途羔羊」——完全唔知幾時要化妝、幾時要出門、幾時要企定定。結果成個朝早，新娘好似阿媽搵仔咁四圍搵人。記得好好brief你嘅另一半，俾份清晰嘅流程時間表佢，唔好靠佢個腦。

第六彈：律師都有個人風格

證婚律師唔係求其搵個人簽個名咁簡單。有啲律師好感性，講到全場眼濕濕；有啲擅長搞氣氛，似棟篤笑；有啲就好官腔，令你以為自己上緊法庭。睇多幾個，揀一個同你channel一樣嘅，證婚環節自然圓滿。

第七彈：Rundown好趕，點樣預時間？

Plan好咗rundown之後，如果發現冇咩時間影相，一定要同攝影師事前夾清楚「必影清單」同「可skip清單」。唔好到時先嚟落差感——你以為會影嘅嘢，攝影師可能因為時間唔夠而跳過。夾清楚，大家就唔會失望。

第九彈：斟茶次序之謎——問自己屋企人

父母先？定祖父母先？

有啲人話父母先，因為「冇父母點會有新人呢？」；有啲人話祖父母先，因為「長幼有序」。兩個講法都有道理。最緊要係：問你自己屋企人。阿媽話點就點，阿嫲話點就點，世界和平。唔好靠網上討論區決定。

第十彈（終極篇）：大妗姐 vs 攝影師——最容易磨擦嘅組合

呢個係我最常見、亦係最容易產生磨擦嘅問題。

如果你打算請大妗姐，要知道佢嘅角色係堅守傳統禮儀，希望新人在吉祥祝福下完成每個儀式。而同時，而家好多婚禮流程都由攝影師主導，攝影師有佢自己嘅時間同畫面考慮。兩個都冇錯，但如果冇事前溝通，就好容易喺婚禮當日變成角力——大妗姐話要逐個儀式做，攝影師話要跟flow走，新人夾喺中間兩邊為難。

解決方法好簡單，但好多新人忽略：主動問清楚大妗姐每個儀式需要幾長時間，然後話俾攝影師知，等攝影師可以調節佢嘅時間表。互相尊重，各施其職，大妗姐守住禮儀，攝影師留住靚相，雙贏。